Bêste minsken
As jimme dit leze, hat it koar fakânsje. De lêste
repetysje wie 28 juny, sjonge oant it skoft en dêrnei foar de leafhawwers noch
in hapke en in snapke.
Wy nimme jimme efkes mei werom nei 31 augustus 2016,
de earste repetysje nei de grutte fakânsje.
Nei ôfrin wurde de lêste ynstruksjes jûn foar de
fytstocht oankommende sneon.
Sneon 3 septimber 2016 is it safier. Fanôf it
Molewjuksplein starte moarns by ideaal waar 27 fytsers. In kostlike dei, de
loft is stiif blau.
Mar nei sa’n útsje moat der fansels ek wer wurke
wurde, dat betsjut repeteare en optrede!
Snein 9 oktober wurkje wy mei oan in tsjerketsjinst yn
Tsjummearum. Krystsnein yn de tsjinst te Marsum. It koar past krekt ûnder de
mânske krystbeam. Guon manlju rinne fierder de krystdagen mei de nullen yn it
hier.
Woansdei 22 maart oant 21.00 oere sjonge en nei it
skoft de jiergearkomste. Twa jubelarissen wurde yn de blomkes set; Jan Nauta en
Jos Steggerda om ‘t sy elk 45 jier lid fan it koar binne.
Goedfreed 14 april ferlient it koar har meiwurking oan
de earetsjinst yn Ingelum.
It lêste optreden foar de fakânsje wie op snein 11 juny
2017 yn MCL, wêr ’t it koar har meiwurking ferliende oan de tsjerketsjinst.
As je alles sa op in rychje sette is der noch bêst wat
wurk ferset. Mar mei in dirigint as Feike van Tuinen is it altyd in plesier om
te sjongen.
Wy kinne yn tankberens werom sjen op in goed sjongjier
mar net sûnder stil te stean by minsken dy’t nau by it koar belutsen wiene mar dy’t
ús it ôfrûne jier ûntfallen binne.
Feike van Tuinen syn mem ferstoar 12 desimber 2016. Sa
lang as mooglik, wie sy oanwêzich by de útfieringen. Op 1 jannewaris 2017
ferstoar Otto Wijbenga, man fan ús lid Griet Wijbenga út St. Anne. Op 7 jannewaris hawwe wy ôfskie
fan him nommen yn in bysûndere, muzikale tjsinst.
Op 26 febrewaris ferstoar ús lid Anneke Nicolaij fan
Stiens, har ôfskiedtsjinst wie 3 maart 2017. Anneke hie yn septimber de
fytstocht noch mei fytst en de lêste kryst noch meisongen yn Marsum. Unbegryplik!
Takom jier 2018 bestiet it koar “Halleluja” 125 jier
en dat wurdt 14 april mei in jubileumkonsert fierd. Feike van Tuinen skriuwt
spesjaal foar dit jubileum in nije komposysje. We sille ús bêst dwaan en alle seilen
bysette om goed foar it fuotljocht te kommen.
En jimme witte it fêst noch wol: as jimme graach sjonge
meie, binne jimme fan herte wolkom op de repetysjejûn woansdeitejûns fan 20.00
– 22.00 oere yn de Molewjuk. Noch in nijtsje: it koar hat no ek in eigen blogspot
wêrop û.o. moaie foto’s stean: www.hallelujabitgummole.blogspot.nl
Goede fakânsje tawinske en oant in oare kear!
Groetnis, it bestjoer